دِ هَيورِه بيم؛ گِرِتيم وِ سا
دِ آغوش تُو نُوُونِسِم چي رُوِه دِ دُنيا
وِم گُتي بِل نيرِ راسي دِ تيِت با هِكِه ها بِفتي سِر پا
گُتي طُورِت بِه دُرِسي با تا طوفانِن دِ خُت بُوني وِ لا
گُتي دَس دي دِ زُوني و نُومِن وِ خين خُت بيار وِ جا
گُتِم بُوِم تُو بييي و پُشت و پِنَم تُو؛ دِما تُو چطور رُوِم مين فريبِ دُنيا
گُتي پاكي بِه وِ پِشنيت با و نجابت آسارِه تيا
گُتِم زِمونِه وام تُورِسِه و نَه دِ غِريو نير بينِم و نَه آشنا
گُتي دُرِسي وا هر كِه دييي؛ دِ آرِمُونِش با؛ حتي اَگِر دير با و هِه بُنگي دِش بيا
گُتِم يِني بِييرِم باوِ هجر و تيامِن محروم كُنِم د هُومسا؟
گُتي مُردِنِه پيا اوسِنِه كِه بِسِه دِ مُلك خُوشُو و دِ وِر تِژغا نَزِنِه وا لا
گُتِم اي ديار نِميا چول با و ميا بَپاييش تا رَشمِه بِييرِه پا
گُتي نياكانِت وِ سُوار اسب نُوم ايرانين دِ دنيا كِردِن بي همتا
تُو هم گُومي وِردار تا مِه هم تِه پروردگار دَسِم پُر با و سِرمِه بِييرِم بالا
اَر دِ مِه اِشنُويي؛ تا جُو ها دِ پات؛ رَه آسارِن بَكُو تمنا
پوشِنِت اَر بي وِ پَرويي عِيو نارِه؛ بِل طُورِت دِ ادب و دانش بوئِه كَلما
گُتِم اَر بِييتِه؛ خُو مِه هم راحت تِر تُركِسِم دي شُوگارِ بي آشنا
گُتي هي اِمتِحُون دَهرِه و هَمون جِوونين ميا سالم بَگُوارني دِ پِرتگاهِ فِنا
گُتي رَه پُرشِه دِ افسون و مِوادا دِ پيري افسوس نِصيوِت با
زَرق و بَرقِ پيك زيادِه مين رَت و بَپا نا ارزشي نُونِت دِ تنگنا
گُتِم هي كِه تُو گويي چَشِ ظاهر نِها و ميا دِرينِت بيار با
گُتي هين دِ مِنزِل وِ مِنزِل ياري وِ دَس و كِليلِش ها دِ صداقت و ذاتِ بي ريا
گُتِم اَر پام دِ راسي سُرِس و سِر نيام وِ دامُونِ جِفا؟
گُتي اوسِنو دِ جِهَنِمتِه و دِ وِ ديارِ پاكي نيايي وا دِما
گُتِم اَر وِ مالگَه رَسِسِم و عِلَم كِردِم كولا؟
گُتي هيرِت وا ديارِت با و وِلات پِدِرين دِ دِرين خدا بِها.